محتاجك تركز معايا لان احنا هنفصل عن الدنيا شوية بسيطة نركز فيها على نفسنا علشان نفهم يعني ايه ايمان وبعدها نرجع الدنيا تاني وان شاء الله نرجع واحنا مبصرين شوية.
العقل هو المكان اللي بنستخدمه فى معالجة وتحليل الافكار، يعني اي فكرة بتعجبك وتمشي مع هواك ومعتقداتك عقلك بيصدقها. كدة انت عقلك خلاص اصبح مقتنع بالفكرة.
طيب امتي تبقي مؤمن بالفكرة دي ؟
دي درجة اعلي من الاولي وهي ان قلبك يبدأ ينفعل مع الفكرة .. يعني مشاعرك بدأت تتحرك مع الفكرة، كدة انت اصبحت مؤمن بالفكرة .. لأن قلبك وعقلك اصبحوا متفقين ومربوطين بحبل قناعة قوي وفى الحالة دي بيبقي صعب جدا ان الايمان ده يتزعزع بسهولة.
ازاي ممكن توظف المعلومة دى فى تقوية ايمانك بالله ؟
لو لاحظت فى كتاب الله هتلاقى القلب هو المحرك الرئيسى الايمان … القران نزل علي قلب سيدنا محمد "فَإِنَّهُۥ نَزَّلَهُۥ عَلَىٰ قَلۡبِكَ بِإِذۡنِ ٱللَّهِ مُصَدِّقٗا لِّمَا بَيۡنَ يَدَيۡهِ وَهُدٗى وَبُشۡرَىٰ لِلۡمُؤۡمِنِينَ" ولما سيدنا ابراهيم حب يزود جرعة الايمان طلبها من الله "وَإِذۡ قَالَ إِبۡرَٰهِـۧمُ رَبِّ أَرِنِي كَيۡفَ تُحۡيِ ٱلۡمَوۡتَىٰۖ قَالَ أَوَلَمۡ تُؤۡمِنۖ قَالَ بَلَىٰ وَلَٰكِن لِّيَطۡمَئِنَّ قَلۡبِيۖ " وفيه امثلة كتير من داخل كتاب الله بتوضح اهمية القلب.
القلب عامل زي شاحن الموبايل كدة، محتاج تدخل له كلام الله يوميا علشان يشتغل .. ولما يشتغل ينور عالطول .. ولو نور قلبك، نَفسك هتخشع وتتخلى عن الهوى(اللي هو المزاج) وتبدأ تدخل فى مرحلة التزكية.
خلى بالك ان الله بيتعامل معانا من خلال القلب علشان كدة القلب ده مهم جدا فى حياتك لازم تعتني به كويس وتشحنه عالطول علشان لو اصابه مرض ممكن لا قدر الله يخرج من رحمة الله ويضيع منك قال تعالى "فِي قُلُوبِهِم مَّرَضٞ فَزَادَهُمُ ٱللَّهُ مَرَضٗاۖ وَلَهُمۡ عَذَابٌ أَلِيمُۢ بِمَا كَانُواْ يَكۡذِبُونَ"
تدبر القرآن وإشحن قلبك بالايمان علشان يرجع سليم وتعدى الامتحان وانت فى أمان.
عضويتي 
محتاجك تركز معايا
العرض العادي
