هذه كلمات منتزعة من حضارة عريقة لطفولة من الماضي السحيق
منشأها مدينة من أعرق المدن المغربية ـ فاس ـ عاصمة العلم والعلماء ..
هي ترديدات الأمهات بالوليد البكر ذكرا او أنثى
الحلقة الاولى
تمتلك المرأة الفاسية رصيدا لغويا غنيا بالمصطلحات التي تمكنها من التواصل بصغيرها والتعبير عن مشاعرها بأسلوب يمتزج بين الحنان والدعابة. لذا سأحاول ان أعوذ بذاكرتي للوراء واذكر بعض العبارات التي تربينا عليها :
* عند استيقاظ الصغير من النوم :
-صباح الندى فالوردة والعسيلة فالشهدة.
- صباح الزين بصباحو ومائة ناقة فامراحو، ماية خادم تخدم عليه وماية بقرة تحلب ليه.
- صباح السعد والسعادة الخادم اسمها سعادة والعبد اسمو سعيد..
- صباح الخير يا المير يا بو قشابة حرير.
* عندما تراقصه:
- طبلو للشيكي يشطح فدريجة دي باب السطح طبلولو وهو يشطح.....
*
وحين تلاعبه :
- يضع كل مشاركين في اللعبة ايديهم على الأرض وتبدأ الام :
اجرادة مالحة، فين كنت سارحة، في جنان الصالحة، اش كليتي، اش شربتي، غير التفاح والنفاح ، يا قاضي يا مفتاح، هز الديب عصاتو، منديلو فوق راسو. (ثم تسأله عن ماذا يشتهي من طعام وتطلب منه أن يعض يده ويقبلها ثم يخبئها) ثم تقول له :
- لالا جارة جارة ( نعام نعام) يا ودينات الفارة (نعام نعام) ، يال القطة المهرارة (نعام نعام) ، طابت عشاتك ولا مزالة. طااابت تيو تيو ما حنة تيو تيو ما حنا.. ...
*
عندما تغازله
اذا كانت بنتا:
- تن وتن و تن لالة، زينها تيفتن لالة، زينة البنات لالة القمرة ضوات
- لالة بنتي وبنت بوها جاو الخطاب يخطبوها بالاك العدا تعيبوها.
- لالة بنتي بيضة، خديداتها كي الفنيدة حلف بوها ما يعطيها حتى تموت الناس عليها.
اذا كان ولد ا:
- تن وتن وتن لالة زينو تيفتن لالة يحفضو لي ربي لالا وينجيهلي ربي لالة.....تينوسني فلمسكن لالة تنصيب مع من نهدر لالة يا غطير دشلاضة، يا قريعة دلموناضة.
- سيدي عطا وأنا رضيت ورحمتو نرجاها، طالبتو و أعطاني و مزينو بعطية.
- سيدو وسيد سيادو واللي عيبو ماصابو، سيدو وسيد الجيران واللي مابغاهشي لهلا ،سيدو وسيد سيادو وكل من فالدار عبيدو حتى من باه سيدو.
- سيدي و قليلة عليك مئة دالعبيد يدورو بيك
و مئة دالخدم يخدمو عليك و سبع عواتق يغسلو ليك...
- سلمو يا سالم تازة من الريح ومن العجاجة ومن العين اللي محتاجة سلمو ياربي وحضيه حتى تبوسلو الخدم يديه.
- سيدي (الاسم) يالمير يا بوجلابة دلحرير اللي ميحبك يالمير يعمى ويسوق الحمير.
- لله يا ناس الحومة انا دخيل عليكم اذا داز سيدي ( اسم) تما لا تهزوا عينيكم الزين ما تماشي، الملح بالكموسة وداك سيدي (اسم) وما احلات فيه البوسة....
* عندما تنادي صغيرها باسمه و تضيف إليه تشبيها جميلا مثل :
- لالا زهور شمس الضهور عليك السلطان تيدور.
- سيدي محمد يا مريود عينية نجيبلو الخدم باللبسة الشاشية يقابلوه من الصبح حتى العشية.
- يا لالة (الاسم) يا زينة البنات يا نور الحياة يا مصباح الدار....
- سعد السعود الما زهر و العود
- لالة البتول الزين المكمول
- سيدي حسن يالمير يا اللي قفطانو حرير.
- هادي دار البنات فيها خوخة وداليا، وفيها عنبوب دالنحاس تيشرشر فيه الما بلا قياس.
أثر من صبانا
العرض العادي
