امي بتسلم عليكم

بتسلم , عليكم

امي بتسلم عليكم

أمى بتسلم عليكم وبتقولكم عايزين بصلتين ..
أمي بتسلم عليكم وبتقولكم دوقوا الملوخية بتاعتنا

أبويا بيقولكو هيفوت دلوقتي على عم صلاح علشان يزورو عمي حسين لأنه عيان

ياابا عم خالد جارنا ضربني .. اكيد انت عملت حاجة غلط علشان يضربك

هاتي يابت الطرحة ألبسها علشان هنشر الغسيل

اومال فين محمود .. تلاقيه نام عند صالح جارنا علشان هم كانوا بيلعبوا مع بعض..

مش هتاكل يا سيد .. لأ خالتي أم محمد حطتلي آكل مع ابنها مجدي وأنا بكتب الواجب أنا وهو

روحي يامديحة قولي لخالتك أم أحمد جارتنا عايزين ننشر بقية الغسيل عندك علشان بلكونتنا مش مكفية .

ماترزعش الباب ياابني واطلع براحة عالسلم احنا بئينا العشا والناس نايمين متقلقهمش

يلا يا ابراهيم فوت على صلاح ابن الجيران وخدوا سيد معاكو وانزلوا الجامع علشان تفرشوا الحصير وتنضفوا الشارع مع عمك عطية علشان صلاة الجمعة

ياأما ياأما محمد جارنا خربش أخويا وعوروا في دراعه ..معلش يابنتي بيتخانقوا وبيرجعوا بيتصالحوا تاني روحي اندهيلوا علشان احطلو مكركروم .

ياااااااااااااه ... دي حياتنا لما كنا عايشين
من امتى ومحدش خبط على باب حد وطلب
طماطم أو بصل أو خبز او حتى نعناع

من امتى ومحدش زار جاره المريض أو حتى من غير مرض وشرب معاه الشاي وقرب منه

طب كام مصيبة حصلت لما عيل اتخانق مع جاره وممكن تطير فيها رقاب

طب كام مرة وصينا ولادنا ميزعجوش الناس ويحترموا وجود بشر عايشين معانا

صحيح كانت البيوت قديمة والحياة بسيطة لكن كانت القلوب حية والإنسان غالي

فقدنا طعم الجيرة وفقدنا التواصل بالود والمعروف سبحان الله ..
كانت القلوب طاهرة
وجملة (أمى بتسلم عليكم) كانت عبارة جميلة بتعبر عن جمال المحبة .. وجمال روح الجيران

واليوم لم تعد الحياة لها طعم بعد الاستغناء عن الجار والسجن بين أربع حيطان

تعالوا نرجع نحب جيراننا ونتعرف عليهم
تعالوا نعتبر ولاد جيراننا زي ولادنا ونصبر على بعض

تعالوا نفوت على بعض في الاعياد والمناسبات ولو نسلم من عالباب ونقول كل سنة وانتو طيبين
تعالوا لو جارنا مريض نزوره ونطمن عليه وندعيله
تعالوا نحترم بعض ونراعي مشاعر بعضنا ونحب للجار مانحب لانفسنا
تعالوا نبطل أذى لبعضنا بالازعاج والصوت العالي وإلقاء القمامة ورزع الباب ولعب الاطفال في اوقات غير مناسبة.
تعالوا نضحك في وش بعض مع مراعاة الاحترام والحشمة والعفة
يا ريت نرجع تاني يبقى لينا كبير نرجع ليه في المشاكل
تعالوا نعيش تاني زي زمان
ممكن 🤔😥😥
#cpd

الموضوع الأصلي: امي بتسلم عليكم || الكاتب: نور || المصدر: منتديات غيمة عطر

منتديات غيمة عطر

---

hld fjsgl ugd;l

أيها المتالق
ربى لايحرمنا من هذا القلم الذهبى
دمت ودام قلمك

كانت ولم تعد على مااظن